Kashfi Lucknavi
jab raushni na pa sake mehr-o-qamar se ham
ḳhud be-niyaz ho ga.e sham-o-sahar se ham
is imtihan men bhi hai tera karam sharik
hans kar guzar rahe hain rah-e-pur-ḳhatar se ham
duniya ko ham dikha.enge me.ar-e-bandagi
qismat bana ke uTThenge ab tere dar se ham
jis ki navazishon pe hai mauquf zindagi
kya hoga gir ga.e agar us ki nazar se ham
zinda hain to banega isi ja phir ashiyan
Darte nahin hain fitna-e-barq-o-sharar se ham
duniya se duur ho ke pata us ka pa ga.e
varna the apne aap se bhi be-ḳhabar se ham
allah rakkhe ḳhanda-e-divangi se duur
hain ashna ma.al-e-gham-e-mo’atabar se ham
‘kashfi’ bana diya use a.ina-e-bahar
guzre kisi ki yaad men jis rahguzar se ham
Leave a Reply