Poet
ajiib jang-o-jidal har pal hai mere andar
ki nur-o-zulmat ka ek maqtal hai mere andar
uge hain mujh men hazar-ha ḳhar-zar paude
phir is pe turra ki ruuh malmal hai mere andar
ye kaisi be-ma.ani zindagi ho ke rah ga.i hai
na kuchh adhura na kuchh mukammal hai mere andar
main janta huun ki ḳhatm hoga na ye ta.affun
magar luTa.unga jitna sandal hai mere andar
samundaron men kahan tamavvuj hai aisa mumkin
ki jo talatum hai jaisi halchal hai mere andar
baḌe-baḌon ko samajh raha hai jo tifl-e-maktab
‘nadim’ aḳhir vo kaun pagal hai mere andar
Leave a Reply