su-e-kalkatta jo ham ba-dil-e-divana chale
gungunate hue ik shokh ka afsana chale
shahr-e-salma hai sar-e-rah ghataen hamrah
saqiya aaj to daur-e-mai-o-paimana chale
is tarah rail ke hamrah ravan hai badal
saath jaise koi udta hua mai-khana chale
shahr-e-janan men utarne ki thi ham par qadghan
yuun chale jaise koi shahr se begana chale
garche tanha the magar un ke tasavvur ke nisar
apne ham-rah liye ek pari-khana chale
khel ummid ke dekho ki na ki un ko khabar
phir bhi ham muntazir-e-jalva-e-janana chale
un ka paigham na laae hon ye rangin badal
varna kyuun saath mire be-khud o mastana chale
ghar se ba-ishrat-e-shahana ham aae the magar
un ke kuche se chale jab to faqirana chale
badalo khidmat-e-salma men ye kah do ja kar
ki tire shahr men ham aa ke gharibana chale
hasrat o shauq ke aalam men chale yuun ‘akhtar’
muskurata hua jaise koi divana chale
Leave a Reply