Wasi Shah
main is hisar se niklun to aur kuchh sochun
tumhare pyaar se niklun to aur kuchh sochun
tiri gali ke alava bhi aur qarye hain
jo is dayar se niklun to aur kuchh sochun
tumhare hijr ki sadiyan tumhare vasl ke din
main is shumar se niklun to aur kuchh sochun
racha hua hai tira ishq meri poron men
main is ḳhumar se niklun to aur kuchh sochun
ye mera jism ki matam sara.e hasrat hai
main is mazar se niklun to aur kuchh sochun
ye mujh men kaun mire raat din sambhalta hai
is iḳhtiyar se niklun to aur kuchh sochun
tumhare jism ki ḳhushbu ne kar diya mas.hur
is abshar se niklun to aur kuchh sochun
ye be-qarari miri ruuh ka ujala hai
main is qarar se niklun to aur kuchh sochun
Leave a Reply