Irfan Siddiqi
badan ke donon kinaron se jal raha huun main
ki chhu raha huun tujhe aur pighal raha huun main
tujhi pe ḳhatm hai janan mire zaval ki raat
tu ab tulu bhi ho ja ki Dhal raha huun main
bula raha hai mira jama-zeb milne ko
to aaj pairahan-e-jan badal raha huun main
ghubar-e-rahguzar ka ye hausla bhi to dekh
hava-e-taza tire saath chal raha huun main
main ḳhvab dekh raha huun ki vo pukarta hai
aur apne jism se bahar nikal raha huun main
Leave a Reply