yasmeen-hameed

Dariya Ki Rawani Wahi Dahshat Bhi Wahi Hai

dariya ki ravani vahi dahshat bhi vahi hai

aur Dubte lamhat ki surat bhi vahi hai

alfaz bhi likkhe hain vahi nok-e-qalam ne

auraq pe phaili hui rangat bhi vahi hai

kyuun us ka sarapa na hua naqsh-ba-divar

jab main bhi vahi huun miri hairat bhi vahi hai

kyuun barf si padti hai kahin shahr-e-darun par

jab muzhda-e-khurshid men hiddat bhi vahi hai

kyuun DhunDne nikle hain nae gham ka khazina

jab dil bhi vahi dard ki daulat bhi vahi hai

raste se miri jang bhi jaari hai abhi tak

aur paanv tale zakhm ki vahshat bhi vahi hai

ta-umr nigahon ke liye ek sa manzar

saae ki tarah saae ki qimat bhi vahi hai

More Poems

Leave a Comment