sula kar tez dharon ko kinaro tum na so jaana
ravani zindagani hai to dharo tum na so jaana
mujhe tum ko sunani hai mukammal dastan apni
adhuri dastan sun kar sitaro tum na so jaana
tumhare da.ere men zindagi mahfuz rahti hai
nizam-e-bazm-e-hasti ke hisaro tum na so jaana
tumhin se jagta hai dil men ehsas-e-rava-dari
qayam-e-rabt-e-baham ke saharo tum na so jaana
agar niind aa ga.i tum ko to chashme suukh ja.enge
kabhi ghaflat men paḌ kar kohsaro tum na so jaana
tumhin se bahr-e-hasti men ravan hai kashti-e-hasti
agar sahil bhi so jaa.en to dharo tum na so jaana
sada-e-dard ki ḳhatir tumhen ‘kausar’ ne chheḌa hai
shikasta-saz ke bedar taaro tum na so jaana
Leave a Reply