vafa ki raah men dil ka sipas rakh dunga
main har nadi ke kinare pe pyaas rakh dunga
karegi tishna-labi faisle sadaqat ke
jhulaste ḳheme tara.i ke paas rakh dunga
gulab surḳh tabassum se denge mera pata
shafaq men apna main ḳhuni libas rakh dunga
jahan dilon ko andheron ka samna hoga
vahan main apne charagh-e-havas rakh dunga
zaban valon ka chehra kabhi na utrega
ghamon ke honTon pe aisi miThas rakh dunga
mire lahu ki adalat sajegi ankhon men
gavahiyon ko main ashkon ke paas rakh dunga
Leave a Reply