Nooh Narvi
hamesha tamanna-o-hasrat ka jhagḌa hamesha vafa-o-mohabbat ka hullaḌ
thame kya tabi.at ruke kis tarah dil ye aafat vo fitna ye andhi vo jhakkaḌ
jo raz-e-mohabbat ko janega koi to ye jaan le vo macha dega gaḌbaḌ
nazar ki tarah baḌh nazar ki tarah ruk nazar ki tarah mil nazar ki tarah laḌ
mire dil ke hathon se bahr-e-vafa men miri zindagi men na ho jaa.e gaḌbaḌ
kabhi kasrat-e-ranj-o-gham ka thapeḌa kabhi josh-e-ummid-o-hasrat ki ojhaḌ
kahan main huun aisa ki tu mehrban ho kahan qismat aisi ki asan ho mushkil
agar aur gahak nahin koi tera to ai ḳhanjar-e-naz mere gale paḌ
bashar kya farishte jo piTen DhinDhora to kyuun kar chhupe raaz kam-baḳht dil ka
idhar aah nikli hamari zaban se udhar mach gaya saari duniya men hullaḌ
sar-e-ham-sari husn-o-naz-o-ada men na rakhta tha koi na rakkhega koi
tira aks-e-a.ina hai aur tu hai jo laḌna hai tujh ko to apne hi se laḌ
bahar-e-javani hayat-e-javani na ye ghair-fani na vo ghair-fani
urus-e-chaman ka utarta hai gahna ḳhizan ke zamane men hoti hai patjhaḌ
hazaron mare hain hazaron mare hain hazaron marenge hazaron miTenge
vo insan nahin us ko samjho farishta jo bardasht kar le mohabbat ki ojhaḌ
vo arz-e-tamanna ko fariyad samjhe vo fariyad ko gham ki rudad samjhe
zara si miri baat thi lekin us ka hua rafta rafta kahan tak batangaḌ
udhar aish-o-ishrat idhar yas-o-hasrat jahan vaale dekhen jahan ki do-rangi
kahin koi paiham bachata hai baghlen koi piTta hai kahin sar dhaḌa-dhaḌ
mohabbat ne chhoḌa ye turfa shagufa bahar-e-javani bhi dil ne na dekhi
abhi phulne-phalne ke din kahan the magar kaT ga.i naḳhl-e-ummid ki jaḌ
jo ik jang-ju idrak sulh-ju ho to jhagḌa na uTThe bakheḌa na uThe
dil-o-dil-ruba men nibhe kya mohabbat udhar vo bhi ziddi idhar ye bhi akkhaḌ
kiye saikḌon ahd-o-paiman-e-ulfat magar ḳhair se koi sachcha na nikla
vo kahte hain milne ko ab hashr ke din kahin ho na jaa.e kuchh us din bhi gaḌbaḌ
muqaddar men likkha tha hun kar bigaḌna koi kyuun na marta koi kyuun na uThta
zamin-doz ahl-e-zamin ho ga.e sab paḌi asman se vo sar par do-hatthaḌ
jo navak chale aur talvar nikli to qaa.em raha main hi ahd-e-vafa par
kisi ne kisi ko bhi phir kar na dekha paḌi imtihan-ghar men kuchh aisi bhagaḌ
samajhte hain aghaz-o-anjam apna mah-o-mehr kya a.enge tere aage
idhar se udhar un ka phir ja.ega munh laga.egi sharmindagi aisa thappaḌ
ḳhayal-o-tasavvur men hargiz na laana hansi dil-lagi men hamesha uḌana
mire da.av-e-ishq ki qadr kya ho vo is ko samajhte hain majzub ki baḌ
jahan dekhta huun vahan dekhta huun jidhar dekhta huun udhar dekhta huun
mohabbat ki shorish mohabbat ki udham mohabbat ka ghaugha mohabbat ka hullaḌ
maza jab hai aapas men kuchh jang bhi ho maza jang men jab hai kuchh sulh bhi ho
dikha de talavvun ka apne tamasha idhar laḌ udhar mil idhar mil udhar laḌ
bahaya mazamin ka tum ne dariya ghazal men bahut ḳhuub ash.ar likkhe
zamane ko ai ‘nuh’ hairat na kyuun ho ki tufan aisa zamin aisi gaḌbaḌ
Leave a Reply