zamin thi saḳht mujhe koi naqsh-e-pa na mila
tiri gali se jo nikla to rasta na mila
dua thi chiḳh thi ya ehtijaj tha kya tha
hile the honT magar harf-e-mudda.a na mila
badan ki qaid se chhuTa to log pahchane
tamam-umr kisi ko mira pata na mila
main chahta tha ki tevar bhi dekh le mere
ghanim jab bhi mila mujh se gha.ebana mila
nafas nafas koi mujh ko pukarta kyuun hai
nazar ko jab ki basarat ka za.iqa na mila
ye bazm-e-sh.er-o-adab hai ki kucha-e-bad-nam
yahan to jo bhi mila hai munafiqana mila
mile hain yuun to bahut tishnagi ke dasht ‘ziya’
koi bhi dasht magar misl-e-karbala na mila
Leave a Reply