Poet
chhupi hui kahin sajdon men sar-kashi to nahin
ye meri rasm-e-ibadat bhi bandagi to nahin
baghair vaj.h ye saaqi ki be-ruḳhi to nahin
main sochta huun kahin kuchh ḳhata hui to nahin
main mutma.in huun magar sirf ye bata diije
ye gham jo aap ne baḳhsha hai aarzi to nahin
sabhi ke dil men mohabbat ki aag hoti hai
sabhi ko raas bhi aa.e ye lazmi to nahin
ajal ka chehra nazar aa.e kuchh bandhe Dharas
rah-e-hayat men itni bhi raushni to nahin
tasavvurat men kuchh der kho to jaata huun
magar ab in men bhi agli si dilkashi to nahin
chaman vahi hai baharen vahi hain gul bhi vahi
magar gulon men vo ḳhushbu vo tazgi to nahin
har ek chiiz nazar aati hai udaas udaas
kahin ye mere hi ehsas ki kami to nahin
ye saare ranj ba-qaid-e-hayat hi to nahin
hayat meri koi umr ḳhizar ki to nahin
kisi pe barse koi buund buund ko tarse
ye aur jo bhi ho saaqi ki munsifi to nahin
kabhi jo ‘nur’ koi rishta-e-vafa TuuTe
ye dekh lena ki ankhon men kuchh nami to nahin
Leave a Reply