ba-qadr-e-zarf mohabbat ka karobar chale
maza to jab hai ki har lamha zikr-e-yar chale
tiri nigah ke jab ahl-e-dil pe vaar chale
ḳhizan-nasib chaman janib-e-bahar chale
utar na jaa.e kahin tere husn ki rangat
ki teri bazm se ab tere jan-nisar chale
jo aa ga.i kabhi sar dene ki ghaḌi ai dost
ḳhushi ḳhushi tire divane su-e-dar chale
udaas dekh ke mahaul-e-mai-kada saaqi
niyaz-mand-e-vafa aaj sogvar chale
ma.al-e-lazzat-e-shauq-e-visal ki saugand
qarar mangne aa.e the be-qarar chale
ḳhayal-e-bada-kashi aa gaya jo ai ‘maikash’
adab se janib-e-mai-ḳhana bada-ḳhvar chale
Leave a Reply