jab jab bhi ham ne ham-nashin dil ka kaha nahin kiya
aisa laga hai zindagi ka haq ada nahin kiya
kahne ko yuun to aap se shikve hazar the magar
ham ne kabhi ḳhilaf-e-dil koi gila nahin kiya
dil ke muamlat the dil men hi dafn kar liye
us bevafa se ham ne phir zikr-e-vafa nahin kiya
kuchh to hua zarur hai ham se agar ḳhafa hai vo
ham ne to jan-bujh kar us ko ḳhafa nahin kiya
kar-e-jahan men ḳhub-tar guzri hai apni zindagi
lekin ye dil pe bojh hai kar-e-ḳhuda nahin kiya
tanha.iyon men ḳhud se hi ham mahv-e-guftugu rahe
us ke siva kisi se phir ahd-e-vafa nahin kiya
aisa bhi daur-e-zist tha shah-rag se vo qarib tha
ab hai vo be-niyaz to ham ne pata nahin kiya
a.enge lauT kar vo hi dil ko yaqin tha is liye
ham ne kisi ke vaste darvaza va nahin kiya
Leave a Reply