Yasmin Husaini Zaidi Nikhat
mujh pe to gire ḳhanjar tum lahu lahu kyon ho
zaḳhmi mere bal-o-par tum lahu lahu kyuun ho
tum ko to mile tamghe zohd-o-parsa.i ke
sang to paḌe mujh par tum lahu lahu kyon ho
dil ke chaak main apne ek bhi na sil paa.i
hain tumhare charagar tum lahu lahu kyuun ho
tum ko to mila rutba sar ke taaj hone ka
zer-e-pa hai mera sar tum lahu lahu kyon ho
yuun to mutma.in huun main be-vafa tumhen phir bhi
sochti huun ye aksar tum lahu lahu lahu kyuun ho
rang gul saba ‘nik.hat’ sab tumhare hisse men
ḳhaar hain mira zevar tum lahu lahu kyon ho
Leave a Reply