jise likh likh ke ḳhud bhi ro paḌa huun
main apni ruuh ka vo marsiya huun
miri tanha.iyon ko kaun samjhe
main saaya huun magar ḳhud se juda huun
samajhta huun nava ki sho.alagi ko
sukut-e-harf se lams-e-ashna huun
kisi se kiya milun apna samajh kar
main apne vaste bhi na-rasa huun
koi suraj hai fan ka to mujhe kya
main apni raushni men sochta huun
mira sahra hai meri ḳhud-shanasi
main apni ḳhamushi men gunjta huun
mujhe ye justuju rakhti hai hairan
ki main sahba huun ya sahba-numa huun
Leave a Reply