mufassal dastanen muḳhtasar kar ke dikha.enge
tavalat umr bhar ki jast bhar kar ke dikha.enge
jo sapne dekh rakkhe hain jahan-e-dida-e-va ne
unhen ta.abir ke zer-e-asar kar ke dikha.enge
ye vo nam-nakiyan hain jo hava dengi alaav ko
ye vo aansu hain jo ḳhud ko sharar kar ke dikha.enge
bharosa rah gaya kuchh ḳhaak ko ham par agar to ham
fana ke samne jivan basar kar ke dikha.enge
talaffuz par na ho mauquf jab kuchh to ma.ani ko
kisi ke lafz kya zer-o-zabar kar ke dikha.enge
ye badal kya dikha.enge hava ko mushta.il ho kar
ye patte peḌ ko kya dar-ba-dar kar ke dikha.enge
ijaza ho gaya mojaz-bayani ka to ham tere
isi tuḳhm-e-tahayyur ko shajar kar ke dikha.enge
agar patal ban ja.ega us ki tah men utrenge
agar choTi banega us ko sar kar ke dikha.enge
guman jo os ke qatron ki surat hain abhi ‘ḳhavar’
kisi din vo tumhen ḳhud ko bhanvar kar ke dikha.enge
Leave a Reply