Rajinder Manchanda Bani
damak raha tha bahut yuun to pairahan us ka
zara se lams ne raushan kiya badan us ka
vo ḳhaak uḌane pe aa.e to saare dasht us ke
chale gudaz-qadam to chaman chaman us ka
vo jhuuT sach se pare raat kuchh sunata tha
dilon men raast utarta gaya suḳhan us ka
ajiib ab-o-hava ka vo rahne vaala hai
milega ḳhvab o ḳhala men kahin vatan us ka
tiri taraf se na kya kya sitam hue us par
main janta huun bahut dost bhi na ban us ka
vo roz shaam se sham.en dhuan dhuan us ki
vo roz sub.h ujala kiran kiran us ka
miri nazar men hai mahfuz aaj bhi ‘bani’
badan kasa hua malbus be-shikan us ka
Leave a Reply