Majrooh Sultanpuri
ye ruke ruke se aansu ye dabi dabi si aahen
yunhi kab talak khudaya gham-e-zindagi nibahen
kahin zulmaton men ghir kar hai talash-e-dasht-e-rahbar
kahin jagmaga uthi hain mire naqsh-e-pa se rahen
tire khanuman-kharabon ka chaman koi na sahra
ye jahan bhi baith jaaen vahin in ki bargahen
kabhi jada-e-talab se jo phira huun dil-shikasta
tiri aarzu ne hans kar vahin daal di hain banhen
mire ahd men nahin hai ye nishan-e-sar-bulandi
ye range hue amame ye jhuki jhuki kulahen
Leave a Reply