qalb-e-varafta mohabbat men kahin aisa na ho
jis ko tu apna samajhta hai vahi begana ho
har sitam par muskurana meri fitrat hai magar
dekhiye is zabt ka anjam kya ho kya na ho
main ne maana aap ne sab kuchh bhula Daala magar
ghair-mumkin hai kabhi mera ḳhayal aata na ho
husn ko ye gham ki jalve ho rahe hain be-naqab
ishq ko ye fikr namus-e-nazar rusva na ho
shauq se tu bhuul ja ai bhulne vaale magar
is taghaful men koi pahlu tavajjoh ka na ho
gir gaya un ki nigahon se dil-e-ḳhana-ḳharab
meri nazron se bhi gir jaa.e kahin aisa na ho
bahar-e-takmil-e-nazara ye bhi lazim hai ‘nasim’
mere un ke darmiyan haa.il koi parda na ho
Leave a Reply