Poet
kya koi mire gham main raat bhar taḌapta hai
kyon mira dil-e-mahzun shaam se dhaḌakta hai
ashiqi ki basti men sha.iri ki duniya men
dard jitna baḌhta hai aadmi nikharta hai
chand so gaya shayad raat Dhalne vaali hai
kis umiid men ai dil phir bhi tu machalta hai
kaj-kulah mah-paro meri bhi zara sun lo
aftab ko dekho ek vaqt Dhalta hai
kab bujha sakoge tum tirgi ke matavalo
ik charagh jo mere ḳhun-e-dil se jalta hai
aaj phir chali shayad sham-e-gham ki purva.i
chandni men kyon aḳhir zaḳhm-e-dil mahakta hai
ibtida-e-ulfat hai aur kisi ki furqat ki
dhimi dhimi anchon par aaj kaun jalta hai
vo jo ek pagal hai kahte hain jise pasha
gul-ruḳhon ki sohbat men aur bhi sanakta hai
Leave a Reply