Waliullah Wali
koi apne vaste mahshar uTha kar le gaya
yaani mere ḳhvab ka manzar uTha kar le gaya
zaḳhm-ḳhurda tha yaqinan koi ḳhushbu-ashna
jo laga tha sar pe vo patthar uTha kar le gaya
gosha gosha a.ina-ḳhana nazar aaya mujhe
ḳhud ko jab bahar se main andar uTha kar le gaya
kyuun sarabon ko samajhta hai vo bahr-e-be-karan
kyuun vo meri zaat ka paikar uTha kar le gaya
kuchh na kuchh le kar hi kuchh deti hai duniya is liye
ḳhud-gharaz duniya se main daftar uTha kar le gaya
main to sang-e-mil huun har rah-rau ke vaste
kya milega koi mujh ko gar uTha kar le gaya
atlas-o-kam-ḳhvab men malbus tha jis ka badan
kyuun miri maili si vo chadar uTha kar le gaya
kal talak jo kah raha tha mere fan ko ra.egan
aaj vo mera ghazal-sagar uTha kar le gaya
kis ne mujh ko anjuman men kar diya tanha ‘vali’
kaun meri fikr ka mehvar uTha kar le gaya
Leave a Reply