Poet
jo raha yuun hi salamat mira jazb-e-valihana
mujhe ḳhud karega sajda tira sang-e-astana
rah-e-haq ke hadson ka na suna mujhe fasana
tiri rahbari ghalat thi ki bahak gaya zamana
main jahan-e-hosh-o-irfan ba-libas-e-kafirana
ba-hijab-e-parsa.i tu hama-sharab-ḳhana
tujhe yaad hai sitamgar koi aur bhi fasana
vahi zikr-e-ab-o-dana vahi fikr-e-ta.erana
miri zindagi ka mehvar yahi soz-o-saz-e-hasti
kabhi jazb-e-valihana kabhi zabt-e-arifana
tira jazba-e-rifaqat mira saath kaise dega
ki main zinda-e-kohistan tu halak-e-ashiyana
miri bazm-e-fikr men hai yahi kashmakash azal se
kabhi chha ga.i haqiqat kabhi jam gaya fasana
vo baja.e aah ‘faruq’ abhi vaah kar rahe hain
abhi dard se hai ḳhali ye nava-e-ashiqana
Leave a Reply