Abdul Mannan Tarzi
dil ki parvaz hai la-makan tak
aql ki jast hai asman tak
barq tadpi to aai kahan tak
ashiyan bas mire ashiyan tak
dard ka silsila hai jahan tak
dil ki jagir hogi vahan tak
log kahte hain ab rah gaya hai
tera qissa miri dastan tak
aap rasman hi kyuun muskurae
dekhiye baat phaili kahan tak
shauq ke marhale bhi hain saare
sirf ehsas-e-sud-o-ziyan tak
ham to hadd-e-yaqin se bhi guzre
aap kyuun rah gae hain guman tak
ab jabin nang-e-sajda nahin hai
kaun jaae tire astan tak
maut aati hai to aae ‘tarzi’
baat dil ki na aae zaban tak
Leave a Reply