main dhund-fazaon men uḌa bhi huun gira bhi
thi quvvat-e-parvaz bhi aur ḳhauf-e-qaza bhi
main apne hi zindan-e-tilismi ka zubun tha
har-chand tiri sho.abada-kari se bacha bhi
laa.i hai kahan mujh ko tabi.at ki do-rangi
duniya ka talabgar bhi duniya se ḳhafa bhi
pa-basta-e-zanjir-e-hava chhuT ga.e hain
mauquf hua silsila-e-qatl-e-nava bhi
ḳhvabida lahu bazu-e-parvaz men jaaga
raushan hui dhundla.i hui zard faza bhi
ankhen hain magar ḳhvab se mahrum hain ‘mid.hat’
tasvir ka rishta nahin rangon se zara bhi
Leave a Reply