dil Mein Hai Kya Jaaniye Kis Ka Khayal-E-Naqsh-E-Pa

Shah Naseer

dil men hai kya janiye kis ka khayal-e-naqsh-e-pa

lag gaiin ankhen zamin se jo misal-e-naqsh-e-pa

taqat uthne ki nahin hai tan men zoaf-e-ishq se

haal apna in dinon hai hasb-e-hal-e-naqsh-e-pa

safha-e-sahra men hai khar-e-mughilan juun alif

khuub ai majnun tiri aai hai fal-e-naqsh-e-pa

yak-qalam ai gul-badan rashk-e-gul-e-qalin hai dekh

farsh-e-khakistar hai tera ye nihal-e-naqsh-e-pa

dur-fishani se tiri rahta hai ham-chashm-e-sadaf

tha yahi ai chashm-e-tar tujh se saval-e-naqsh-e-pa

tiktiki yaan tak bandhi haigi ki khal-e-mardumak

ban gaya is shokh ka har vajh khal-e-naqsh-e-pa

sujhta hai haath se is na-tavani ke ‘nasir’

rafta rafta honge ik din paemal-e-naqsh-e-pa