Poet
ye kah ke raḳhne Daliye un ke hijab men
achchhe bure ka haal khule kya naqab men
ḳhurshid-zar hove zamin de jhaTak zara
sau aftab hain tire gard-e-naqab men
be-etidalyan miri zarf-e-tunak se hain
tha naqs kuchh na jauhar-e-sahba-e-nab men
uThne men sub.h ke ye kahan sar-giraniyan
zahid ne mai ka jalva ye dekha hai ḳhvab men
tahqiq ho to janun ki main kya huun qais kya
likkha hua hai yuun to sabhi kuchh kitab men
main aur zauq-e-bada-kashi le ga.iin mujhe
ye kam-nigahiyan tiri bazm-e-sharab men
imdad-e-chashm kya ho lagi dil ko aag jab
jalne ke ba.ad ḳhuun nahin rahta kabab men
hain donon misl-e-shisha ye saman-e-sad-shikast
jaisa hai mere dil men nahin hai habab men
anvar-e-fikr se na hua kuchh bhi inkishaf
jitna baḌhe ham aur baḌhi ja hijab men
ye umr aur ishq hai ‘azurda’ ja-e-sharm
hazrat ye baten phabti hain ahd-e-shabab men
Leave a Reply