ḳhushk us ki zaat ka saton samundar ho gaya
dhuup kuchh aisi paḌi vo shaḳhs banjar ho gaya
angan angan zahr barsa.egi us ki chandni
vo agar mahtab ki surat ujagar ho gaya
mere aadhe jism ki us ko lagegi bad-dua
kal ḳhabar aa ja.egi vo shaḳhs patthar ho gaya
kis ne apne haath se ḳhud maut ka katba likha
kaun apni qabr par ibrat ka patthar ho gaya
qurb jab had se baḌha duuri muqaddar ho ga.i
us ka milna bhi na milne ke barabar ho gaya
main ki bahar ki faza men qaid tha jis ke sabab
aaj vo ḳhud jins ke pinjre ke andar ho gaya
muft men taqsim ki ‘sajid’ mata-e-sha.eri
jis ne apna qurb apnaya vo sha.er ho gaya
Leave a Reply