Ameer Raza Mazhari
mire sajda-e-ha-e-niyaz ko tire astan ki talash hai
kisi fard ki ye talab nahin ye to ik jahan ki talash hai
na.i sarzamin ki hai justuju na.e asman ki talash hai
jo makan bhi Thiik na rakh sake unhen la-makan ki talash hai
mire pa-e-shauq-e-safar men hain abhi rah-o-rasm ki bandishen
mujhe naqsh-e-pa ki hai justuju mujhe karvan ki talash hai
jo ḳhizan-nasib azal ke hain unhen fasl-e-gul ki hai aarzu
vo jo thak chuke hain bahar se unhen ab ḳhizan ki talash hai
ye mira kamal-e-musavvari ye mira shu.ur-e-sanam-gari
abhi zauq husn-e-kasif hai ise jism-o-jan ki talash hai
miri zindagi ka fasana kya jo sinaon shauq se aap ko
kisi mehrban ki talash thi kisi mehrban ki talash hai
jo qafas se chhuT ke aa.e ham kisi shaḳh ne bhi jagah na di
hain chaman men aa ke bhi be-nava hamen ashiyan ki talash hai
abhi qarz un ki nazar pe hai tire jalva-ha-e-majaz ka
jo haqiqaton se guzar chuke unhen dastan ki talash hai
tire dushmanon ki safon pe ye kisi daur men na chamak saki
tiri tegh-e-naz ki aaj tak sar-e-dostan ki talash hai
ḳhas-o-ḳhar ko bhi jo diye ‘raza’ tar-o-taza rahne ka hausla
usi baghban ki hai aarzu usi gulistan ki talash hai
Leave a Reply