jaane kya jurm hua hai mujh se
mera saaya bhi juda hai mujh se
jism ka bojh liye ja.un kahan
ḳhilqat-e-shahr ḳhafa hai mujh se
yuun kiya be-sar-o-saman us ne
mujh ko bhi chhin liya hai mujh se
meri hasti hai yahan kitni haqir
mera saaya bhi baḌa hai mujh se
phir tabahi ki naved aa.i hai
phir vahi shaḳhs mila hai mujh se
hadisa koi use pesh aaya
apna ghar puchh raha hai mujh se
tohmaten naam lagi hain ‘shahid’
shahr men kaun bura hai mujh se
Leave a Reply