yaron ke iḳhlas se pahle dil ka mire ye haal na tha
ab vo chaknachur paḌa hai jis shishe men baal na tha
insan aa kar nai dagar par kho baiTha hai hosh-o-havas
pahle bhi behosh tha lekin aisa bhi bad-hal na tha
gulshan gulshan virani hai jangal jangal sannaTa
haae vo din jab har manzil men shorish-e-gham ka kaal na tha
kyuun re divane shahr yahi hai ik ik pal bhari hai jahan
apne virane men ai dil ji ka ye janjal na tha
ham jo luTe us shahr men ja kar dukh logon ko kyuun pahuncha
apni nazar thi apna dil tha koi paraya maal na tha
teri ḳhaak pe raushan raushan ‘aḳhtar’ jaise sitare the
tujh sa ai mahran ki vaadi koi buland-iqbal na tha
Leave a Reply