idhar hai bad-e-sumum nalan udhar hai barq-e-tapan bhi aajiz
miri baharon se ho ga.i ab haram-zadi ḳhizan bhi aajiz
ye hosh-o-aql-o-ḳhirad ki ḳhami pe hirs-e-rahbar ki tishna-kami
ki jis ko sairab karte karte hua hai aksar kuaan bhi aajiz
kiya hai yuun azm-e-mustaqil ne ḳhilaf un ke mahaz qaa.em
ki aaj kal hai sitamgaron ki chunin bhi aajiz chunan bhi aajiz
tamam rindon ne mai-kade men ab aisi shorish macha rakhi hai
ki shishe ulTe surahi aundhi hai mera pir-e-mughan bhi aajiz
jafa.en din raat dhate dhate sitam ke baani bhi thak na jaa.en
shikar chuhon ka karte karte na hon kahin billiyan bhi aajiz
harim-e-naz-o-ada men un ki ye kaun dahqani bolta hai
hai na-tarashida guftugu se zaban bhi lutf-e-zaban bhi aajiz
Leave a Reply