Qadir Siddiqi
haq vafaon ka jafaon se ada karte hain log
aaj ki duniya ko kya kahiye ki kya karte hain log
aankh pur-nam honT larzan dil ghamon se paash paash
is tarah bhi zindagi ka samna karte hain log
ai zamane ki ravish teri vafa-koshi ki ḳhair
ahd-o-paiman toḌ kar va.ada vafa karte hain log
ai vafur-e-zindagi ye bhi tira e.ajaz hai
zahr piite hain musalsal aur jiya karte hain log
utna utna dil men uThta hai baghavat ka ghubar
jitna jitna dil ko paband-e-vafa karte hain log
us ke paane ki masarrat chand lamhe bhi nahin
jis ko kho kar umr bhar ah-o-buka karte hain log
meri rudad-e-alam men koi pahlu hai zarur
sun ke rudad-e-alam kyon hans diya karte hain log
jab bhi hota hai jafaon ka kahin bhi tazkira
naam jaane kyon tumhara le liya karte hain log
sub.h-e-nau ki yaad men kaTti hai har sham-e-firaq
sukh ki ummidon men aksar dukh saha karte hain log
ranj-o-gham aish-o-masarrat dhuup bhi hai chhanv bhi
hanste hanste zindagi men ro diya karte hain log
kaun kaam aata hai aaḌe vaqt par ‘qadir’ ye dekh
ziist ke har moḌ par yuun to mila karte hain log
Leave a Reply