tiri jabin pe miri sub.h ka sitara hai
tira vajud miri zaat ka ujala hai
harif-e-partav-e-mahtab hai jamal tira
kuchh aur lagta hai dilkash jo duur hota hai
mire yaqin ki ma.asumiyat ko mat Toko
miri nigah men har naqsh ik tamasha hai
nazar to aa.e koi raah zindagani ki
tamam alam-e-imkan ghubar-e-sahra hai
na aarzu se khula hai na justuju se khula
ye husn-e-raz jo har shai men kar-farma hai
gham-e-hayat raha hai hamara gahvara
ye ham se puchh dil-e-dard ashna kya hai
charagh le ke use DhunDne chala huun main
jo aftab ki manind ik ujala hai
jo ham ko bhuul ga.e un ko yaad kyuun kiije
tamam raat koi chupke chupke kahta hai
kahan kahan liye phirti hai zindagi ab tak
main us jagah huun jahan dhuup hai na saaya hai
Leave a Reply