ahmad-shanas

Jism Ke Bayaban Mein Dard Ki Dua Mangen

jism ke bayaban men dard ki dua mangen

phir kisi musafir se raushni zara mangen

kho gae kitabon men titliyon ke bal-o-par

soch men hain ab bachche kya chhupaen kya mangen

zaafrani kheton men ab makan ugte hain

kis tarah zaminon se dil ka rabta mangen

ham bhi ho gae shamil masnui tijarat men

ham ki chehra-saman the ab ke aaina mangen

varna ilm namon ka uth na jaae dharti se

aadmi phale-phule aao ye dua mangen

is se peshtar ki ye raat muund le ankhen

nanhe-munne jugnu se raushni zara mangen

vo sadaen deta hai akhiri jazire se

aur ham nigahon ka husn-e-ibtida mangen

kis ke samne rakhiye khol kar raza apni

aur kis se jaadu ka bolta diya mangen

More Poems

Leave a Comment