Wakil Akhtar
zindagi dast-e-tah-e-sang rahi hai barson
ye zamin ham pe bahut tang rahi hai barson
tum ko paane ke liye tum ko bhulane ke liye
dil men aur aql men ik jang rahi hai barson
apne honTon ki dahakti hui surḳhi bhar do
dastan ishq ki be-rang rahi hai barson
dil ne ik chashm-e-zadan men hi kiya hai vo kaam
jis pe duniya-e-ḳhirad dang rahi hai barson
kis ko ma.alum nahin vaqt ke dil ki dhaḌkan
meri hamraz-o-ham-ahang rahi hai barson
saaf tariḳh ye kahti hai ki mansuri se
muzmahil satvat-e-aurang rahi hai barson
meri hi abla-pa.i ki badaulat ‘aḳhtar’
rah-guzar un ki shafaq-rang rahi hai barson
Leave a Reply