Poet
hasrat se dekhta huun tiri rahguzar ko main
samjha.un kis tarah ye dil-e-be-ḳhabar ko main
kya duun javab un ke isharon ka ham-nashin
samjha nahin huun aaj tak us fitna-gar ko main
rahbar hi saath hai na hai manzil ka hi nishan
rahon se be-ḳhabar huun chala huun safar ko main
dekha karo na pyaar se meri taraf huzur
bas men na rakh sakunga phir apni nazar ko main
is bebasi men shauq ki parvaz dekhiye
le hi uḌa huun ta.ir-e-be-bal-o-par ko main
ja.ega ji ke saath hi ye rog ai ‘kanval’
lekin ye baat kaise kahun charagar ko main
Leave a Reply