Dinesh Kumar Drouna
ye tark-e-rabt to farda pe Taal rakhna tha
kisi bhi haal men rishta bahal rakhna tha
dilon ki talḳhiyan saḌkon pe khinch laaya tu
purane rabt ka kuchh to ḳhayal rakhna tha
ye us ki soch hai apni vafa kare na kare
tumhen to apna kaleja nikal rakhna tha
yuun guftugu ka koi silsila baḌhane ko
hamen javab men phir se saval rakhna tha
mire ḳhayal ki jumbish bhi bhanpne vaale
tumhara naam to ham ko ghazal rakhna tha
main uTha aur tire paas koi baiTh gaya
miri ye bhuul thi mujh ko rumal rakhna tha
Leave a Reply