jab bayan karoge tum ham bayan men niklenge
ham hi dastan ban kar dastan men niklenge
ishq ho mohabbat ho pyaar ho ki chahat ho
ham to har samundar ke darmiyan men niklenge
raat ka andhera hi raat men nahin hota
chand aur sitare bhi asman men niklenge
dekh to kabhi shab ko karvan sitaron ka
nuur ke kai mahmil kahkashan men niklenge
boliyan zamane ki mukhtalif to hoti hain
lafz pyaar ke lekin har zaban men niklenge
kaat kar badan saara qaash qaash men jhanken
aap ke hayule hi qalb-o-jan men niklenge
khaak ka samundar bhi kya ajab samundar hai
is jahan men dubenge us jahan men niklenge
qissa-e-sukhan-goi jab ‘adim’ aaega
ham bhi vaqia ban kar dastan men niklenge
sirf sabz patte hi ped par nahin hote
kuchh na kuchh parinde bhi ashiyan men niklenge
Leave a Reply