Syed Sarosh Asif
jo baat tere lab pe hai aa kar ruki hui
vo baat mere dil men hai kab se chubhi hui
main aur vaqt mil ke use dekhte rahe
achchhi bahut lagi vo ghaḌi dekhti hui
hoti nahin hai meri ibadat men kyuun sharik
hai kaisi ruuh mere badan men chhupi hui
aisa koi mila hi nahin ham se jo kahe
mil kar janab aap se behad ḳhushi hui
ye baat ab charagh ko kaise bata.en ham
kuchh tirgi hai is ke tale bhi chhipi hui
aao ‘sarosh’ tum ko bujha kar hi dekh len
jalne se bhi tumhare kahan raushni hui
saari guzar di hai kisi ek ke liye
sayyad ‘sarosh’ ye bhi koi zindagi hui
Leave a Reply