jis ne rakkha hai hamesha nafraton ke darmiyan
vo dhaḌakta phir raha hai dhaḌkanon ke darmiyan
zindagi ko ghaur se dekha to mujh ko yuun laga
ek tava.if jis tarah ho manchalon ke darmiyan
us harim-e-naz se shikva kiya tha ek din
manzilen bikhri paḌi hain raston ke darmiyan
bebasi si bebasi hai kya kahen kis se kahen
main to pyasa mar raha huun badalon ke darmiyan
na-rasa.i ka ye dukh to maar Dalega mujhe
kasmapursi ka saman hai chahaton ke darmiyan
‘mir’ ke lahje men ghazlen kah raha huun aaj bhi
naam kuchh kuchh ban raha hai ghalibon ke darmiyan
pyaar ke saare manazir dhundlakon men Dhal ga.e
kuchh kami si rah ga.i thi rabton ke darmiyan
zindagi ke is bhanvar se kaun nikle dekhiye
che-mi-goiyan ho rahi hain be-bason ke darmiyan
sar pe chhat na sa.eban hain bebasi to dekhiye
kaghzi ik pairahan hai barishon ke darmiyan
faḳhta zaitun ki shaḳhon par maari ja.egi
faisla ye ho chuka hai zalimon ke darmiyan
doston rahne bhi do jhuTi tasalli kis liye
vaqt achchha kaT raha hai mushkilon ke darmiyan
vo akela hai aur us ke chahne vaale bahut
jang hone ja rahi hai ashiqon ke darmiyan
dushmanon se kah diya hai fikr meri chhoḌ den
main khaḌa huun aaj bhi kuchh doston ke darmiyan
kis tarah ‘da.em’ kaTega be-yaqini ka safar
mashvara ye ho raha hai qafilon ke darmiyan
Leave a Reply