Gham Ka Sahra Na Mila Dard Ka Dariya Na Mila

Sahir Hoshiyarpuri

gham ka sahra na mila dard ka dariya na mila

ham ne marna bhi jo chaha to vasila na mila

muddaton ba.ad jo a.ine men jhanka ham ne

itne chehre the vahan apna hi chehra na mila

qatl kar ke vo ghanimon ko jo vapas aa.e

apne hi ghar men unhen koi shanasa na mila

ham bhi ja nikle the suraj ke nagar men ik din

vo andhera tha vahan apna bhi saaya na mila

tishna-lab yuun to zamane men kabhi ham na rahe

pyaas jo dil ki bujha deta vo dariya na mila

mil ga.e ham ko sanam-ḳhanon men kitne hi ḳhuda

DhunDne par koi banda hi ḳhuda ka na mila

aap ke shahar men peḌon ka nahin koi shumar

do ghaḌi rukne ko lekin kahin saaya na mila

sabz patton se mila ham ko baharon ka suragh

shaḳh-e-nazuk pe magar koi shagufa na mila

mustahaq ham tiri rahmat ke na hone paa.e

teri duniya men koi uzr ḳhata ka na mila

ḳhud-numa.i ke bhi is daur men ham ko ‘sahir’

koi qatil na mila koi masiha na mila