chaak pe rakkhe hain tasvir bana di jaa.e
varna us jagah se ye miTTi haTa di jaa.e
tum ne kya soch ke rakkha hai yahan kuza-garo
gar nahin Dhalna to vaj.h bata di jaa.e
rang-o-ḳhushbu to azal se miri kamzori hai
sabz mausam se miri duniya saja di jaa.e
ho gaya kucha-e-tohmat men to jiina mushkil
jurm ki ab to saza ham ko suna di jaa.e
a.ina-ḳhane men hairan se sab baiThe hain
in zamin-zadon ki hairat hi miTa di jaa.e
faisla paar utarne ka kiya hai ‘shahnaz’
ab zara aḳhiri kashti bhi jala di jaa.e
Leave a Reply