Poet
ab miri nigahon men auj hai na pasti hai
ek sail-e-mad-hoshi ik hujum-e-masti hai
ai nigah-e-na-mahram ishq ki vo basti hai
jis qadar ujaḌti hai us qadar hi basti hai
ashiqi-o-mahbubi aa.ine ke do ruḳh hain
husn ek baada hai ishq ek masti hai
jazba-e-ibadat ko rakh jaza se begana
varna haq-parasti bhi ik havas-parasti hai
dil ki pa.emali ka gham to kuchh nahin lekin
aisi pur-faza basti mushkilon se basti hai
dida-var koi dekhe shan-e-pir-e-mai-ḳhana
is ḳhudi ke chehre se be-ḳhudi barasti hai
himmaton ke bal uTTho ḳhud-ravi ke bal niklo
laghzishon ke bal chalna nang-e-mai-parasti hai
aadmi ke chehre par bandagi nahin rahti
varna ḳhud-parasti bhi ik ḳhuda-parasti hai
Leave a Reply