Baqi Siddiqui
vo andhera hai jidhar jaate hain ham
apni divaron se Takrate hain ham
kaTte hain raat jaane kis tarah
sub.h-dam ghar se nikal aate hain ham
band kamre men sukun milne laga
jab hava chalti hai ghabrate hain ham
haa.e vo baten jo kah sakte nahin
aur tanha.i men dohrate hain ham
zindagi ki kashmakash ‘baqi’ na puchh
niind jab aati hai so jaate hain ham
Leave a Reply