Kabir Ajmal
ik tasavvur-e-be-karan tha aur main
dard ka sail-e-ravan tha aur main
gham ka ik atish-fishan tha aur main
duur tak gahra dhuan tha aur main
kis se main un ka Thikana puchhta
samne ḳhali makan tha aur main
mere chehre se numayan kaun tha
a.inon ka ik jahan tha aur main
ik shikasta naav thi ummid ki
ek bahr-e-be-karan tha aur main
justuju thi manzil-e-mauhum ki
ye zamin thi asman tha aur main
kaun tha jo dhyan se sunta mujhe
qissa-e-ashuftagan tha aur main
haath men ‘ajmal’ koi tesha na tha
azm tha koh-e-giran tha aur main
Leave a Reply