Lahr Lahr Kya Jagmag Jagmag Hoti Hai

lahr lahr kyā jagmag jagmag hotī hai

jhiil bhī koī rañg badaltā motī hai

kaavā kaaT ke uupar uThtī haiñ qāzeñ

gun gun gun gun paroñ kī gunjan hotī hai

chaḌhtā huā parvāz kā nashsha hai aur maiñ

tez havā rah rah kar Dañk chubhotī hai

gahre sannāTe meñ shor havāoñ kā

tārīkī sūraj kī laash pe rotī hai

dekho is be-his nāgin ko chhūnā mat

kyā mālūm ye jāgtī hai yā sotī hai

merī ḳhasta-mizājī dekhte sab haiñ magar

kitne ġhamoñ kā bojh uThā.e hotī hai

kis kā jism chamaktā hai paanī meñ ‘zeb’

kis kā ḳhazāna raat nadī meñ Dubotī hai

Leave a Comment