Ram Awtar Gupta Muztar
qasida fat.h ka dushman ki talvaron pe likkha hai
jo ham ne nara-e-takbir yalgharon pe likkha hai
shanasa.i bhi tere shahr men jab ajnabi Thahri
to apna naam ham ne ghar ki divaron pe likkha hai
shab-e-gham asman ko takta rahta huun pahron yuun
ki jaise gardish-e-qismat ka hal taron pe likkha hai
amal se dosto duniya hai jannat bhi jahannam bhi
nisab-e-zindagi insan ke kirdaron pe likkha hai
use puuje hai ‘muztar’ ugta suraj jaan kar duniya
ki jis ne naam apna vaqt ke dharon pe likkha hai
Leave a Reply