main to tanha tha magar tujh ko bhi tanha dekha
apni tasvir ke pichhe tira chehra dekha
jis ki ḳhushbu se mahak jaa.e shabistan-e-visal
dosto tum ne kabhi vo gul-e-sahra dekha
ajnabi ban ke mile dil men utarta jaa.e
shahr men koi bhi tujh sa na shanasa dekha
ab to bas ek hi ḳhvahish hai ki tujh ko dekhen
saari duniya men phire aur na kya kya dekha
koi surat bhi shanasa nazar aa.i na hamen
ghar se nikle to ajab shahr ka naqsha dekha
is qadar dhuup thi sanvla ga.e raḳhshan chehre
jalte suraj ka magar rang bhi piila dekha
peḌ ka dukh to koi puchhne vaala hi na tha
apni hi aag men jalta hua saaya dekha
the andheron ke ta.aqub men ujale kya kya
ḳhud tamasha the ‘jamil’ aur tamasha dekha
Leave a Reply