Apna To Ye Kaam Hai Bhai Dil Ka Khun Bahate Rahna

apna to ye kaam hai bhaai dil ka khuun bahate rahna

jaag jaag kar in raton men sher ki aag jalate rahna

apne gharon se duur banon men phirte hue avara logo

kabhi kabhi jab vaqt mile to apne ghar bhi jaate rahna

raat ke dasht men phuul khile hain bhuli-bisri yadon ke

gham ki tez sharab se un ke tikhe naqsh mitate rahna

khushbu ki divar ke pichhe kaise kaise rang jame hain

jab tak din ka suraj aae us ka khoj lagate rahna

tum bhi ‘munir’ ab un galiyon se apne aap ko duur hi rakhna

achchha hai jhute logon se apna-ap bachate rahna

Leave a Comment