Maratib Akhtar
is saya-dar peḌ ko jaḌ se ukhaḌ ke
kya mil gaya tujhe miri duniya ujaaḌ ke
ab aur intizar kar ai khokhle badan
main aa raha huun madd-e-muqabil pachhaḌ ke
tanha mujhe basit ḳhala men uḌa diya
ham-zad ne bayyaz-e-tasalsul se phaaḌ ke
kyuun chand ki taraf hain ravan kam-nigah log
dil ki rida se azmat-e-pasti ko jhaaḌ ke
is ḳhud-numa ki rif.at-e-buniyad dekhiye
paanv zamin-bos hain unche pahaḌ ke
shohrat ki aag asl men ik naqsh-e-dud thi
bujh kar bikhar ga.i tira huliya bigaḌ ke
Leave a Reply